سؤال دايمًا بيتكرر:
إيه الفرق بين النشا العادي والنشا المعدل؟
خليني أشرح لك الموضوع ببساطة 👇
أولًا: يعني إيه نشا عادي؟
النشا العادي، أيًا كان مصدره (ذرة – بطاطس – تابيوكا – أرز)، في وضعه الطبيعي بيكون غير مستقر.
🔹 يعني إيه غير مستقر؟
يعني بيفقد خواصه مع الوقت، وقوة الربط بتاعته بتقل، وده بيأثر على المنتج خلال فترة الصلاحية،
زي ما نقول المنتج “بيفك” أو “بيسوي ميّه”.
وده طبعًا ماعجبش الخواجة 😅 (خرستو حبيبي).
فقرر يعمل إيه؟
قرر يطوّر من النشا ويخليه “أقوى وأنضج” شويه، فبدأت تظهر حاجة اسمها “النشا المعدل”.
يعني إيه نشا معدل؟
هو نفس النشا العادي… لكن اتعمل عليه تعديل (بطريقة فيزيائية أو كيميائية) علشان:
- يزود الثبات وقت الحرارة أو التخزين
- يحسّن القوام
- يقلل التفاعل مع الحموضة أو الأملاح
- يمنع فصل المكونات زي الميّه والزيت
- يدّي شفافية للجل في بعض الاستخدامات
- يحسن قدرة النشا على ربط المياه
مميزات النشا المعدل:
بعد التعديل، النشا بقى:
- 🟢 مستقر في الحرارة العالية
- 🟢 يقاوم الحموضة والأملاح
- 🟢 يستحمل الخلط الشديد أو الضغط الميكانيكي
- 🟢 ثابت في التجميد والتبريد
- 🟢 يعطي قوام ثابت أثناء التخزين
- 🟢 بعض أنواعه تعمل جل شفاف
- 🟢 يربط المياه بكفاءة
- 🟢 فيه أنواع تشتغل على البارد (جلتنة باردة)
ليه ده مهم لصناعتنا؟
لأن في صناعات زي:
- الجبن المطبوخ
- الموزاريلا
- المايونيز
- الحلويات
- الصوصات
- وحتى الشيبس والمقرمشات
لازم تستخدم نشا مناسب لكل بيئة وظروف تصنيع. وعشان كده تلاقي أكواد وأنواع مختلفة من النشا المعدل مخصصة لكل تطبيق.
الخلاصة:
النشا المعدل هو نسخة مطورة من النشا العادي، هدفها تحسين الأداء التصنيعي والثبات في ظروف مختلفة زي الحرارة والحموضة والتخزين. ضروري جدًا في الصناعات الغذائية الحديثة وخصوصًا الألبان.
